labarai:- Zaben maye gurbin Sanatan Bauchi: Dalilin da yasa mutanen Dogara basu zabi dan takarar Buhari ba

Jama’ar karamar hukumar Bogoro a jihar Bauchi sun bayyana dalilinsu na zaben jam’iyyar PDP a zaben maye gurbin sanatan Bauchi ta kudu da aka yi sati biyu da suka wuce. Duk da kasancewar APC ce ta samu nasara a zaben, jam’iyyar ba ta iya samun nasara a karamar hukumar Bogoro da shugaban majalisar wakilai Yakubu Dogara ya fito ba. Jam’iyyar PDP ta samu kuri’un da suka ninka na APC a karamar hukumar. Shugaban jam’iyyar PDP na karamar hukumar Bogoro, Honarabul Daniel Musa, ya shaidawa jaridar Vanguard cewar Dogara bai yiwa dan takarar APC yakin neman zabe ba a mazabar sa, wata manuniya kan cewar bai damu ko ya samu nasara ko ya akasin haka ba. Yakubu Dogara “Shugaban majalisar wakilai bai fito fili ya yiwa jam’iyyar APC ko dan takarar ta yakin neman zabe ba, amma wasu sun ce ya nemi a zabi jam’iyyar APC amma bana jin hakan gaskiya ne ,” a cewar Musa